Echojounal Echojounal se jew zòrèy ou
Atik Ki Lye
Gouvènman defakto a ki gen nan tèt li Garry Conille nan tèt kole ak manm « konsèy prezidansyèl chak moun fè ti kout la » ki pa fè anyen pou rezoud pwoblèm ensekirite a nan peyi a lakoz plizyè lekòl oblije fèmen pòt yo, sa ki po te ko ouvri yo tou rete fèmen.
Sityasyon sa pa rete sèlman nan kapital la men li afekte kèk vil pwovens tankou Ponsonde, Lestè, Ti rivyè pou site sa yo, sa rive apre gwo masak bandi « Gran grif » yo te fè sou popilasyon Ponsonde a, atak bandi te fè sou lekòl mè yo nan Lestè, mache pran zòn bandi Savyen yo ak alye yo kokorat san ras ap fè detanzan an.
Nan kapital la kèk lekòl pat gentan ouvri nan kèk zòn tankou: Gresye, Gantye, Kwadèboukè, Lasalin, Kabarè pou site kèk lekòl nan kèk zòn. Atak mesye Jeff Kanaran ak Izo yo sou Akayè lakoz kèk lekòl nan komin nan tou fèmen pòt yo e anpil elèv ak paran oblije pran kannòt pou al kache nan zòn Lagonav pou pa mouri anba bal selon enfo yo.
Nan kè kapital la sityasyon an vin pi konplike apre mesye « Viv Ansanm » yo deside mache pran zòn nan blòk Solino, yon aksyon ki fèmen tout lekòl nan Solino ak tout zòn ki tou pre yo.
Pou bay ensekirite plis jarèt nan peyi a, gouvènman defakto a ki gen nan tèt li Garry Conille deside antre nan gwo goumen ak « manm konsèy prezidansyèl chak moun fè ti kout la » pou gen plis pouvwa nan plas misyon yo.
