Echojounal Echojounal se jew zòrèy ou
Atik Ki Lye
Apre plis pase nèf (9) mwa fèmen pou ensekirite, lopital « Isaïe Jeanty et Leon Audain » ki gen ti non « Chancerelles » ouvri pòt li jounen lendi 2 desanm 2024 la anba gwo kout bal malgre yon gwo delegasyon ki te gen nan tèt li minis sante a, Dr Duckenson Bléma Lorthé ki te prezan nan espas la.
Nan moman delegasyon an tap rive anpil kout bal te chante, manm delegasyon yo tankou jounalis yo, kèk lòt otorite nan gouvènman defakto a pat ka chita nan machin yo te ye yo se te kouche, pil sou pil, koube tèt pou yo pa pran bal pandan lopital sa gen misyon pou akouche fanm ansent.
Si malgre gwo dispozitif sekirite ki te gen pou delegasyon an sityasyon te difisil konsa e moun ki pral frekante lopital la yo ki pap gen menm yon polisye pou akonpaye yo a, kijan sa ap ye? kijan doktè yo ki pa abite nan zòn nan yo ap fè desann pou vin travay?
Nou ap fè ou konnen li entèdi pou machin pa klaksone nan yon zòn ki gen lopital, poutan se bal ki leve moun ki nan zòn lopital « Chancerelles » e fè yo dòmi. Ki dispozisyon ki pran pou rezoud pwoblèm ensekirite nan zòn sila? Donk si li te fèmen pou ensekirite pòt li pa lwen re fèmen paske se mesye ak zàm yo ki okipe tout ti kwen ki pou mennen nan lopital la.
