Echojounal echojounal.net
Related Articles
Se jodia, nan yon seremoni ki gen gou « delivrans » pou kèk moun ak « echèk » pou anpil lòt, manda Konsèy Prezidansyèl Tranzisyon an (CPT) bout ofisyèlman nan Villa d’Accueil. Nan yon diskou ki prevwa pou 10 è nan maten, Laurent Saint-Cyr, dènye prezidan ki ap pase men, ap gen pou li rann kont sou yon bilan ke pifò obsèvatè kalifye kòm yon « fiasco total ».
Pandan Premye Minis defakto Alix Didier Fils-Aimé ak rès gouvènman an ap gade Laurent Saint-Cyr ki ap depoze echa nan, reyalite a deyò a rèd: Gang yo toujou mèt lari a, ekonomi an ajenou, epi espwa pèp la fin deperi.
Si nan kòmansman an, nan mwa avril 2024, CPT a te parèt tankou yon « solisyon ayisyen » pou retire peyi a nan kriz, de lane apre, reyalite a montre se te yon maryaj enterè kote chak manm te ap tire dra a sou bò pa yo.
Pwen nwa yon echèk ki pa ka kache:
- Ensekirite ki ap galope: CPT a pa janm rive mete kontwòl sou teritwa a. Malgre prezans fòs miltinasyonal la, gang yo pi fò pase anvan epi kapital la rete anba syèj.
- Kowipsyon ak Eskandal: Dosye BNC a ak lòt soupçon kowipsyon sou plizyè konseye sal imaj enstitisyon an depi nan kòmansman, sa ki fè yo pèdi tout lejitimite moral devan popilasyon an.
- Lagè pou pouvwa: Olye yo te travay sou eleksyon, konseye yo te pase plis tan nan chire pit ak Premye Minis yo (Garry Conille, apre sa Didier Fils-Aimé) pou kontwole ministè ak bidjè.
- Eleksyon ki tounen miraj: Pwomès pou te òganize eleksyon an 2025 lan tonbe nan dlo. Jodi a, 7 fevriye 2026, pa gen okenn eli ki pou ranplase yo, sa ki lage peyi a nan yon lòt faz ensètitid total.
CPT a ale, men pwoblèm yo rete. Se Alix Didier Fils-Aimé ki ap rete sèl kòmandan bò katedral la pou moman an, ak yon kominote entènasyonal ki ap pouse pou yon « Gouvènman Tranzisyon Inik » pou eseye rive nan eleksyon an mwa out ki ap vini la a.
Pou anpil Ayisyen, 7 fevriye sa a se pa yon fèt, se yon rapèl ke tranzisyon yo nan peyi a tounen yon biznis pou politisyen, pandan malere ap mouri anba bal ak grangou. CPT a ap kite Villa d’Accueil la maten an, men yo kite dèyè yo yon nasyon ki pi divize epi ki gen mwens konfyans nan klas politik li pase anvan.
