Echojounal echojounal.net
Related Articles
Nan yon desizyon ki siprann tout moun, Anbasadè Lèzetazini nan Repiblik Dominiken an, Leah Campos, anonse jounen jedi 12 fevriye 2026 la, yo fèmen biwo ajans lit kont dwòg ameriken an (DEA) ki baze nan kapital la, Sen Domeng.
Se sou rezo sosyal yo Anbasadè a te chwazi lage nouvèl la. Malgre li pa te bay detay presi sou sa ki pase a, pawòl li yo te di anpil bagay. Li deklare byen fèm:
« Mwen pap tolere okenn fòm koripsyon, ni itilizasyon yon fonksyon ofisyèl pou enterè pèsonèl. »
Deklarasyon sa a montre gen gwo sispèk ki ap plane sou tèt kèk ajan oswa responsab anndan biwo DEA a nan peyi vwazen an.
Dapre enfòmasyon ki soti nan ministè Afè Etranjè dominiken an, desizyon sa a pa gen anyen pou li wè ak gouvènman Luis Abinader a. Se yon ankèt entèn Lèzetazini ap mennen sou pwòp ajan pa li yo.
Gen sous ki fè konnen yon gwo chèf nan DEA a, Melitón Cordero, ta menm anba kòd. Yo sispèk li te nan magouy ak viza pou « enfòmatè », kote li te ap sèvi ak pouvwa li pou li fè lajan sou kote.
Anpil moun ap poze tèt yo kesyon si trafik dwòg la pa pral ogmante nan rejyon an ak biwo sa a ki fèmen. Men, Anbasadè Campos rasire tout moun :
- Batay kont nakotrafik la ap kontinye.
- Lèzetazini ap toujou travay ak lapolis dominiken an (DNCD), men sa ap fèt nan yon lòt nivo pandan yo ap netwaye biwo a.
Depi li te pran pòs li nan fen ane 2025, Leah Campos montre li se yon diplomat ki pa nan jwèt. Desizyon sa a voye yon siyal fò : menm si w se yon ajan ameriken, depi ou nan kòripsyon, baton an ap tonbe sou ou.
