Echojounal echojounal.net
Related Articles
Sa ki te dwe yon jou dènye omaj ak lapriyè transfòme nan yon gwo kòlè ak dlo nan je pou fanmi Monfiston Jesula nan vil Wanament. Maten mèkredi 4 mas 2026 la, pandan fanmi an te rann yo nan mòg pou al pran kò defen an pou seremoni antèman an, yo jwenn yon gwo sipriz: kadav la pa la.
Yon disparisyon ki pa ka esplike
Monfiston Jesula, ki te gen 41 lane, te rann dènye souf li depi 25 fevriye pase a. Depi lè sa a, kò a te depoze nan yon mòg nan vil la pandan fanmi an te ap prepare seremoni antèman an. Se nan moman leve kò a, fanmi an reyalize espas kote kò a te sipoze ye a vid.
Msye Precimus, ki se tonton defen an, pa te kache endiyasyon li devan laprès. Dapre temwayaj li, pa gen okenn esplikasyon klè responsab mòg la bay ki ka jistifye kote kadav nyès li a pase.
»Se yon zak ki pa gen non. Nou vin chache kadav nou pou nou ba li yon antèman diy, epi yo di nou kò a pa la, » se sa tonton an deklare ak anpil emosyon.
Lajistis mete men nan pat la
Devan gravite sitiyasyon an, fanmi an pa te pèdi tan. Yon Jij de Pè te deplase rapidman sou plas pou vin fè konsta legal la epi dokimante disparisyon kadav la nan rejis mòg la. Konsta sa a se premye etap enpòtan pou pèmèt lajistis kòmanse travay li.
Avoka fanmi an deja pran dosye a anmen. Dapre enfòmasyon ki disponib, yon plent fòmèl pral depoze kont responsab mòg la pou neglijans grav oswa vòl kadav. Fanmi an ap mande pou limyè fèt vit sou dosye sa a pou yo ka konnen si se yon erè kote yo ta bay yon lòt moun kadav la, oubyen si se yon lòt bagay ki pi lou ki dèyè sa.
Sitiyasyon sa a lakòz anpil pale anpil nan kominote Wanament lan, kote moun kòmanse ap poze keksyon sou sekirite ak serye sant kote yo depoze mò yo nan zòn lan. Pou kounye a, fanmi Jesula ap tann repons nan men otorite yo pandan yo ap mande jistis ak reparasyon pou gwo desepsyon ak doulè sa a yo sot sibi a.
