Echojounal Echojounal se jew zòrèy ou
Atik Ki Lye
Nan yon konferans pou laprès jounen jedi 29 Avril 2021 an, òganizasyon politik ki rele tèt yo sektè demokratik ak popilè a anonse yo pral kontinye mobilize nan lari a pou rive fè echèk ak referandòm lan 27 jen ki ap vini la . Youn nan manm yo Rony Thimote, fè konnen pandan tout mwa Me a ak rès mwa Jen an sektè ak tout manm yo pral mobilize nan tout rakwen nan peyi a pou rive fè echèk ak referandòm pouvwa anplas la .
Sou bò pa li, pòt pawòl sektè demokratik ak popilè a mèt Andre Michel, ki ekate tout posibilite pou yo chita dyaloge ak prezidan Jovenel Moïse, e pwofite envite tout sektè ki vle sèvi peyi a nan tranzisyon an pou chita pale ak prezidan dezinye mèt Joseph Mecène Jean Louis ki ap gen pou mennen tranzisyon an .
Nan fen konferans pou laprès la, ansyen senatè Nenel Cassy ki mande ak kominote entènasyonal la pou pran pozisyon klè kont referandòm jovenel Moïse la. Pilwen ansyen palmantè Nip lan ki salye pozisyon 68 kongresmann ameriken yo ki mande ak administrasyon ameriken an pou pa sipòte pwojè referandòm rejim anplas la .
Dieuva Occidor.
