Echojounal echojounal.net
Related Articles
Lapolis nan depatman Sidès (PNH) mete anba kòd, nan lannwit madi 3 pou rive mèkredi 4 fevriye 2026 la, twa moun pami yo yon minè, ki te moute yon konplo pou fè kwè yo te kidnape jèn fi a nan lide pou rache lajan nan men fanmi li.
Yon operasyon konjwen Sèvis Depatman Polis Jidisyè (SDPJ-Sidès) ak Inite Depatmantal pou Mentni Lòd (UDMO) mennen nan lokalite Ba-Gaya ak Kada, nan komin Kay-Jakmèl, pèmèt lapolis demaske yon rezo ki te ap simile kidnapin.
Dapre rapò Lapolis Nasyonal la bay, se yon jèn fi 16 lane ki te kite kay paran li volontèman. Yon fwa li fin pati, li te kontakte fanmi li pou fè yo kwè gen moun ki sezi li e ki kenbe li an otaj. Nan kad manti sa a, de (2) lòt moun te ap travay kòm konplis pou rann sèn nan parèt pi reyèl.
Lapolis presize wòl chak moun nan konplo sa a:
Jèn fi a (16 lane): Li se sèvo operasyon an ki te planifye disparisyon li.
Premye konplis la: Li te gen misyon pou li kontakte fanmi an epi mande yon ranson. Pou sa, li te egzije pou yo voye lajan an sou yon kont Mon Cash.
Dezyèm konplis la: Se li ki te sèvi kòm chofè moto pou deplase « viktim » lan pandan tout tan li te kache a.
Twa (3) sispèk yo nan men otorite yo nan moman an e yo plase an gadavi. Dosye a ap prepare pou voye devan tribinal pou swit legal ki nesesè yo anba akizasyon « similasyon kidnapinn » ak « asosyasyon malfektè ».
Otorite yo nan Sidès pwofite raple popilasyon an jan de pratik sa yo se move zak ki gaspiye resous lapolis la epi ki simen panik nan kè fanmi yo san rezon, sitou nan yon moman kote peyi a ap goumen kont vrè ensekirite a.
