Echojounal echojounal.net
Related Articles
Yon premye gwoup ki gen ladan li 215 polisyè ak polisye kenya kite tè peyi Dayiti madi swa pou yo tounen lakay yo nan vil Naywobi. Pandan otorite nan peyi Kenya ap eseye prezante depa sa a tankou yon senp « wotasyon, » reyalite a sou teren an nan peyi Dayiti gen yon lòt gou: se yon echèk total kapital pou Misyon miltinasyonal la (MMAS).
Okenn teritwa pa rekipere, gang yo vin pi puisan
Lè premye pye polisye kenya yo te poze Ayiti nan mwa jen 2024, espwa anpil moun te genyen se te wè fòs sa a kore Lapolis Nasyonal (PNH) pou dekwoke gang yo nan katye yo epi libere wout nasyonal yo. Men, de (2) lane apre, bilan an se yon dezas.
Olye pou fòs la te reprann kontwòl zòn gang yo okipe yo, se lekontrè nou wè. Pandan misyon sa a te la, kowalisyon « Viv Ansanm » lan pwofite feblès ak pasivite fòs entènasyonal la pou yo pran plis tè. Jodi a, gang yo kontwole prèske 90% nan zòn metwopolitèn Pòtoprens lan, alòske anvan misyon an te vini, yo te kontwole anviwon 80%.
Yon misyon « estatik » ki te pè batay
Anpil obsèvatè ak sous lokal yo kritike fason polisye kenya yo te konpòte yo. Yo te plis sanble ak « gad kò » ki ap siveye ayewopò, pò ak kèk biwo Leta, olye pou yo te al chache gang yo nan nich yo tankou nan Site Solèy, Kwadèboukè, Matisan oubyen nan Ba-Delma.
Gang yo gaye kò yo plis toujou: Non sèlman gang yo ranfòse baz yo nan kapital la, men yo rive mete pye yo nan zòn ki te gen lapè anvan sa, tankou nan depatman Latibonit ak nan Plato Santral.
Mank volonte ak mwayen: Misyon sa a pa te janm gen ase lajan ni ase moun (yo pa te janm rive nan chif 2 500 moun yo te pwomèt la). Sa lakòz yo te parèt tankou moun ki te ap « mache sou ze » devan kriminèl yo ki gen gwo zam fannfwa nan men yo.
»Force de Suppression des Gangs » (GSF): Yon lòt non pou kache echèk la?
Depa 215 polisyen sa yo fèt nan moman estrikti entèvansyon an ap chanje pou li vin tounen Force de Suppression des Gangs (GSF), yon nouvo fòs Nasyonzini ap sipòte ki sipoze gen plis pouvwa pou atake. Pou anpil Ayisyen, chanjman non sa a se yon prèv klè ke premye misyon an (MMAS) te yon kout dlo nan paswa.
Pandan otorite nan Naywobi ap resevwa polisye sa yo ak gwo seremoni ak lonè, isit nan Pòtoprens, se dlo nan je ak kòlè ki ap domine. Yo pati kite yon peyi kote gang yo santi yo pi fò pase anvan, kote wout yo toujou bloke, epi kote popilasyon an ap kontinye peye gwo taks bay kriminèl pou yo ka sikile.
