Echojounal echojounal.net
Related Articles
Nan moman seleksyon nasyonal Ayiti a ap pare pou li jwe dezyèm Mondyal li nan istwa (premye a se te an 1974), gen yon non ki ap fennen nan bouch tout fanatik foutbòl: Don Deedson Louicius. Alier dwat sa a, ki fèt Taba 11 fevriye 2001, tounen youn nan pi gwo zam ofansif Grenadye yo. De depa li nan akademi Ozetazini pou li pase an Ewòp, jouk li rive nan Major League Soccer (MLS), men yon gade sou pakou yon jwè ki make listwa foutbòl ayisyen an.
Deedson Louicius kòmanse fòmasyon li nan plizyè klèb lokal tankou FC Shana ak AS Truitier, anvan li al jwenn Kalonji Soccer Academy nan leta Georgia (Etazini). Se la li te genyen chanpyona nasyonal U-18 Etazini an an 2019.
Talan gochè sa a pa te pran tan pou li travèse oseyan an pou li al kòmanse karyè pwofesyonèl li an Ewòp, nan peyi Liksanbou ak Danmak:
Hobro IK (2019-2023): Li siyen premye kontra pwofesyonèl li ak klèb danwa sa a. Pandan 4 sezon, li jwe 82 match, li make 22 gòl epi li bay 8 pas desizif.
Odense Boldklub (2023-2025): Li transfere nan OB kote li kontinye briye. Li make 15 gòl ak 10 pas desizif nan 57 match, epi li ede klèb la genyen tit « NordicBet Liga » pou li monte nan premye divizyon danwa a an 2025.
Transfè nan MLS: FC Dallas
Nan ete 2025, klèb ameriken FC Dallas siyen yon kontra ak Deedson jiska desanm 2028. Jwè 25 lane a entegre vit nan sistèm jwèt la. Pandan sezon 2026 sa a ki ap woule la, li deja bay gwo pèfòmans, tankou yon gòl remakab li make kont St. Louis City SC nan mwa avril pase a.
Deedson Louicius fè premye parèt li ak « Grenadye yo » nan dat 25 mas 2021 kont Beliz. Depi lè sa a, li tounen yon pyès endispansab pou ekip nasyonal la. Li genyen kounye a 31 kap (match jwe) epi li make 10 gòl.
Dat Istorik: Nan dat 19 novanm 2025, Deedson make sèl gòl nan match kont Nikaragwa a (1-0). Gòl sa a te bay Ayiti tikè ofisyèl li pou li patisipe nan Mondyal 2026 la apre 52 lanne dat tann.
Ayiti twouve li nan Gwoup C pou faz final Mondyal la ki ap kòmanse mwa sa a, kote yo pral afwonte Ekòs (13 jen), Brezil (19 jen), ak Mawòk (24 jen). Nan dezyèm match preparasyon Ayiti sot jwe kont Perou nan dat 5 jen 2026 la (kote Perou genyen 2-1), se Deedson ki bay bèl pas desizif pou gòl Wilson Isidor te make nan premye mi-tan an.
Avèk vitès li, bèl drib li yo ak gwo fòs li genyen pou li repike nan mitan an pou li choute, Don Deedson Louicius se san mank youn nan espwa Pèp Ayisyen an pou klere je mond lan nan gwo randevou foutbòl sa a.
