Echojounal echojounal.net
Related Articles
Ayiti pa nan yon gwo lagè deklare kont okenn lòt nasyon, men bilan viktim yo montre yon sitiyasyon ki pa gen anyen pou l anvye ak yon peyi ki nan mitan yon gwo konfli lame. Dapre dènye rapò Nasyon Zini pibliye yo, nan yon espas sèlman twa mwa, plis pase 1 408 moun pèdi lavi yo nan peyi a, pandan 656 lòt soti blese anba zak aksyon sanglan.
Chif sa yo mete anfòs yon reyalite ki trajik pou chak fanmi an Ayiti. Bandi ame yo kontinye ap simen lanmò, ap fè kidnapping san rete, epi ap fòse plizyè milye fanmi abandone lakay yo pou al chèche refij nan kondisyon ki rabese diyite moun.
Pandan tan sa a, kritik yo ap tonbe sou fason pouvwa an plas la ap jere kriz la. Popilasyon an aliye anpil repwòch kont gouvènman an ki rete nan yon zòn konfò, san okenn gwo operasyon efikas ki fèt sou teren an pou detwi rezo kriminèl yo ni liberasyon zòn ki anba kontwòl gang yo. Dapre done ki disponib yo, plis pase 50 milyon dola ameriken deja depanse pou peye yon konpayi sekirite prive, men sou teren an, rezilta yo rete nèt ale zewo.
Sitiyasyon an ap vin pi grave sou plan jeografik:
Pwen cho yo: Depatman Lwès ak Latibonit kontinye anrejistre pi gwo kantite moun ki mouri ak moun ki fòse deplase.
Nouvèl menas: Depatman Sant lan ap devwale kòm yon zòn ki nan gwo danje, pandan vil Kap-Ayisyen ak tout depatman Nò a mete an eta dalèt anba menas kriminèl yo ki ap chèche pwolonje teritwa yo.
Fas ak frap sa a, kòlè a ap moute nan mitan sosyete a ki wè otorite yo ap gaspiye lajan Leta nan move opsyon pandan yo echwe kareman sou plan sekirite a. San yon aksyon tèt poze, yon transparans nan fason yo ap sèvi ak resous piblik yo ak yon gwo offansiv pou reprann kontwòl teritwa a, lavi ak lavni pèp ayisyen an ap kontinye rete an otaj.
