Echojounal echojounal.net
Related Articles
Apre li fin pase plis pase sèt (7) lane ap kouri pou lajistis, Vundla Sikhumbuzo, yon sitwayen zimbabwéyen, tonbe nan privat la Polis Nasyonal Ayiti (PNH) nan dat 26 mas 2026 la. Mesye sa a, ke otorite yo prezante kòm « mèt tèt » yon gwo rezo trafik zam, te anba kòd pou patisipasyon li nan dosye Legliz Episkopal Dayiti a ki te pete depi ane 2022.
Vundla Sikhumbuzo pa te ap chache sèlman pou trafik zam. Depi ane 2019, li te gen plizyè manda dèyè li pou move zak li komèt, pami yo:
* Tantativ asasina sou pwòp madanm li.
* Sekestrasyon pitit li yo.
* Blanchiman lajan ak finansman teworis.
Lapolis presize ke sispèk la te ap viv nan lonbraj pandan sèt (7) lane pou evite reponn kesyon lajistis.
Ankèt la montre kijan rezo Sikhumbuzo a te sèvi ak non ak franchiz Legliz Episkopal peyi Dayiti pou fè antre veso ak resipyan (kontenè) ki chaje ak lanmò. Nan kontenè sa yo, yo te jwenn:
* Gwo zam fann fwa ak fizi aso.
* Yon kantite katouch moun pa ka konte.
* Fo lajan (fo biyè vèt).
* Lòt materyèl ilegal ki te sèvi pou ranfòse gang ame yo nan peyi a.
Yo akize Sikhumbuzo kòm moun ki te ap planifye tout operasyon sa yo ak konplisite plizyè lòt moun, pami yo genyen ki te nan gwo pozisyon anndan enstitisyon an ak nan ladwànn.
Apre aretasyon sa a, PNH transfere dosye a bay otorite jidisyè yo. Pou anpil obsèvatè, kout filè sa a se yon gwo viktwa nan batay kont koule zam ki ap tounen san nan peyi a. Sikhumbuzo gen pou li parèt devan yon jij kote li pral gen pou li reponn pou tout krim sa yo ki depase limit imajinasyon.
Pandan popilasyon an ap tann pou wè kijan pwosè sa a pral dewoule, lapolis kontinye ap chache lòt branch nan rezo sa a ki toujou ap simen latwouble nan sosyete a.
