Echojounal echojounal.net
Related Articles
Nan lide pou li vanse ak pwosesis elektoral la nan peyi a, Konsèy Elektoral Pwovizwa (KEP) a demare, nan jounen jedi 26 fevriye 2026 la, premye jounen nan yon seri diskisyon ki pral dire 3 jou. Rankont sa a, ki fèt anba je reprezantan plizyè òganizasyon sosyete sivil la, vize mete tout moun nan menm nivo enfòmasyon sou kijan eleksyon yo pral dewoule.
Pou premye jounen sa a, responsab KEP yo te konsantre sou 3 pwen prensipal :
1– Chanjman nan Dekrè Elektoral la : Yo te prezante nouvo règ ki ap gouvène eleksyon yo, espesyalman sou fason kandida yo dwe enskri ak kijan vòt la pral òganize pou evite magouy.
2- Kalandriye a : Yo bay detay sou dat limit pou aktivite yo, depi enskripsyon pati politik yo rive nan jou vòt la.
3- Bilan aktivite yo : KEP a pwofite montre travay yo deja reyalize sou teren an pou pwouve machin elektoral la gentan an faksyon.
Objektif prensipal inisyativ sa a se pa sèlman bay enfòmasyon, men se sitou pou sansibilize ak mobilize tout sektè nan lavi nasyonal la. Pou KEP a, li enpòtan pou popilasyon an ak òganizasyon yo santi yo konsène pou eleksyon sa yo ka kredib epi fèt nan lapè.
Pandan diskisyon sa yo, reprezantan sosyete sivil la te poze kesyon sou sekirite ak kijan tout moun, menm moun ki deplase yo, pral kapab vote. KEP a bò kote pa l pwomèt l ap kontinye travay pou asire yon pwosesis transparan kote « vwa chak grenn sitwayen ap konte ».
Chita-pale sa a ap kontinye pandan de (2) lòt jounen ankò. Se yon siyal fò enstitisyon elektoral la voye bay kominote entènasyonal la ak aktè politik yo pou di yo ke, malgre defi yo, preparasyon yo ap vanse san rete pou ane 2026 la.
