Echojounal echojounal.net
Related Articles
Dènye rapò trimestryèl Biwo Entegre Nasyonzini an Ayiti (BINUH) pibliye yon bilan ki bay lafyèv : pou pi piti 1 167 moun pèdi lavi yo, 459 lòt blese, epi 137 moun kidnape kont ranson ant 1ye jiyè ak 30 septanm 2026. Men pi lwen pase chif terib sa yo, piblikasyon sa a relanse yon sèl grenn kesyon nan mitan popilasyon ayisyèn nan : a kisa prezans misyon Nasyonzini an sèvi tout bon vre, lè sèl rezilta li ka prezante chak twa mwa se kontabilite lanmò ?
Nan dokiman sa a, BINUH detaye yon seri masak ki frape konsyans nasyonal la. Nan kòmansman mwa out, omwen 19 moun, pami yo 12 fanm granmoun, te gen tèt yo koupe nan Site Solèy. Nan Kenskòf, 105 abitan, ladan yo 19 timoun, te tonbe anba bal nan de atak ame ki te fèt an jiyè ak out. Rapò a soulinye tou vyolans yo ki pa sispann nan zòn metwopolitèn Pòtoprens lan, nan Latibonit ak nan Sidès, kote gang ame yo tounen vin pran kontwòl katye tankou Bèlè, Ba Dèlma ak Lasalin, malgre operasyon fòs sekirite yo te mennen pou te deloje yo.
Pou anpil obsèvatè ak sitwayen ki ap viv lanfè ensekirite a chak jou, rapò BINUH yo vin tounen yon senp woutin biwokratik. Chak trimès, misyon onizyen an soti yon dokiman ki dekri ak presizyon kantite moun ki mouri, kantite fanm ki sibi vyolans seksyèl (omwen 344 ka anrejistre sou peryòd sa a) ak kantite moun ki kidnape.
Men, pandan BINUH ap konte mò ak blese, gang ame yo kontinye ap pwogrese, yo pran nouvo teritwa epi yo menm ap chèche enpoze lwa yo nan pwosesis elektoral la. Pou anpil Ayisyen, misyon Nasyonzini an sanble plis ap jwe wòl yon « kontè kadav » oswa yon obsèvatè pasif, olye li ta pote yon sipò estratejik ak operasyonèl ki efikas pou ede Lapolis Nasyonal (PNH) ak Lame a kraze fwaye gang yo nèt ale.
Lè nou gade estatistik yo pi pre, rapò a montre tou limit repons sekiritè a : si 45 % nan viktim yo tonbe dirèkteman anba men gang yo, 50 % nan moun ki mouri oswa ki blese yo anrejistre pandan operasyon fòs sekirite yo ap mennen kote gen plizyè sivil inosan ki peye frè a tou epi 5 % soti nan gwoup otodefans yo.
Pandan tan sa a, popilasyon an ap mande tèt li konbyen rapò trimestryèl ankò ki dwe pibliye anvan kominote entènasyonal la ak enstitisyon tankou BINUH sispann kontante yo ak konte viktim, pou yo finalman aji pou sove lavi moun ki toujou vivan yo.
