Echojounal echojounal.net
Related Articles
Prezidan ameriken an, Donald Trump, pibliye yon mesaj sou platfòm li an Truth Social jodi vandredi 20 mas 2026 la, kote li fè konnen Lèzetazini ap pare pou « diminye tikras pa tikras » operasyon militè li yo nan Mwayen Oryan kont rejim iranyen an.
Apre plizyè semèn gwo kout zam ak bonbadman nan kad operasyon « Epic Fury », sanble Lèzetazini ap chèche yon fason pou yo soti nan konfli a. Dapre sa prezidan an ekri, li estime ke lame ameriken an prèt pou atenn tout objektif li te fikse yo depi kòmansman ofansiv la nan mwa fevriye pase a.
»Objektif yo prèt pou reyalize »
Nan mesaj li a, Trump deklare : « Nou prèt pou nou rive nan bout objektif nou yo, se poutèt sa nou ap anvizaje diminye tikras pa tikras gwo efò militè nou t ap deplwaye nan Mwayen Oryan kont rejim teworis iranyen an. »
Pawòl sa yo vini yon ti tan apre prezidan an te fin di li pa te vle tande pale de « seselfe » (cessez-le-feu). Men, presyon ekonomik yo ak pri gaz la ki pa sispann moute sou mache entènasyonal la sanble ap fòse Lamezon Blanch chanje estrateji.
Dosye Detwa Ormiz la: Trump lage boul la nan pye lòt peyi
Youn nan pwen ki plis fè moun pale nan deklarasyon Trump la, se koze sekirite nan Detwa Ormiz la (Strait of Hormuz), kote anpil nan petwòl mond lan pase. Trump klè sou sa: li pa vle Lèzetazini kontinye peye pou sekirite zòn sa a pou kont yo.
Li ekri: « Se lòt peyi ki sèvi ak pasaj sa a ki dwe siveye li epi kontwole li si sa nesesè. Se pa Lèzetazini ki ap sèvi avèk li! » Avèk pozisyon sa a, Trump voye yon mesaj bay peyi tankou Lachin, Japon, ak peyi an Ewòp yo, pou di yo se yo ki dwe voye bato lagè pa yo pou pwoteje pwòp enterè yo nan rejyon an.
Malgre anons retrè gradyèl sa a, tansyon an toujou wo sou teren an. Ekspè yo ap mande si se tout bon Lèzetazini ap rale kò li, oubyen si se yon fason pou Trump fòse alye li yo mete men nan rannman an. Pandan tan sa a, Izrayèl poko bay okenn siy kòmkwa li menm li pral sispann operasyon pa li yo kont enterè iranyen yo nan rejyon an.
