Echojounal echojounal.net
Related Articles
Dimanch 8 mas 2026 sa a, Mojtaba Khamenei vini ofisyèlman kòm nouvo Gid Siprèm Repiblik Islamik Iran an. Li ranplase papa li, Ayatollah Ali Khamenei, ki te mouri depi premye jou lagè a, malgre gwo presyon ak avètisman Leta Izrayèl ak peyi Etazini ap fè sou do peyi a.
Pandan fòs lame Izrayèl ak Ameriken ap kontinye pilonnen plizyè zòn nan peyi Iran, Asanble Ekspè yo—ki gen ladan li 88 manm nan klèje chiit la—fè chwa Mojtaba Khamenei pou dirije peyi a. Desizyon sa a tonbe nan yon moman kote tansyon an nan pi wo nivo li nan rejyon Mwayen Oryan an.
Mojtaba Khamenei gen 56 lane. Anpil obsèvatè konsidere li tankou yon moun ki nan zèl di « konsèvatè » yo. Li gen gwo koneksyon ak Gad Revolisyon yo, ki se lame ideyolojik rejim nan. Relasyon sa a montre aklè direksyon nouvo lidè a vle pran: yon liy fèm devan atak ki ap fèt sou peyi li.
Se sou televizyon Leta a yon prezantatè te li kominike a ak anpil solanite. Pandan lekti a, foto Mojtaba Khamenei te ap parèt sou ekran an ak yon riban nwa, kòm siy dèy nasyonal pou lanmò ansyen Gid la.
Pou kounye a, kominote entènasyonal la ap gade ak anpil kè sote kijan nouvo chèf sa a pral jere konfli a, sitou ak prezans lame etranje ki ap frape baz estratejik nan peyi a san rete.
