Echojounal echojounal.net
Related Articles
Rezo Ayisyen Jounalis Kont Koripsyon yo (RHAJAC) pibliye yon nòt de près kote li mande prezidan peyi El Salvadò a, Nayib Bukele, pou li fè anpil atansyon anvan li lanse operasyon militè kont bandi yo sou tèritwa ayisyen an. Siyanatè nòt la, Sekretè Jeneral RHAJAC la, Djovany Michel, lonje dwèt sou yon rezo konplisite ki ta gen ladan li menm otorite nan tèt leta a.
Daprè òganizasyon jounalis yo, Premye Minis defakto, Alix Didier Fils-Aimé ta gen yon antant anba chal pou li kolabore ak prensipal chèf gang yo nan lide pou li ka kenbe pouvwa a. RHAJAC pale tou de sipò ak pwoteksyon gang sa yo ap jwenn nan men gwo aktè politik, biznisman nan sektè prive a, ansanm ak sèten manm nan tèt kòmandman Lapolis Nasyonal Dayiti (PNH) ak lapolis nan Repiblik Dominikèn.
Reyaksyon sa a vini tèt dwat apre yon atak ki te fèt dimanch 18 oktòb 2026 nan zòn Santo (komin Swadboukè), kote kat solda teknisyen nan awonotik ki soti nan peyi El Salvadò te disparèt. Pandan RHAJAC ap kondane atak sa a ak tout fòs epi eksprime solidarite li ak fanmi viktim yo ansanm ak pèp salvadoryen an, li mande pou yo deplwaye tout mwayen nesesè pou jwenn teknisyen sa yo ak mete limyè sou sa ki te pase a.
Sepandan, RHAJAC alète sou danje ki genyen nan fèt ke yo ta inyore rezo konplisite yo. Òganizasyon an mete aksan sou fèt ke yon vrè batay kont kriminèl yo pa ka fèt sèlman sou teren an; li dwe pase tou pa gwo ankèt sou moun ki ap founi yo zam, moun ki ap finanse yo ak rezo ki pwoteje yo a. Si yo pa atake rasin sa yo, sa ka mete lavi militè ki angaje nan operasyon yo nan plis danje epi echwe misyon an.
Nan menm nòt sa a, Rezo a voye yon mesaj bay fòs de lòd yo pou yo toujou pwoteje popilasyon sivil la epi respekte dwa moun nan tout operasyon ki ap mennen. RHAJAC rapòte ke moun ki ap viv nan zòn ki anba kontwòl gang yo se viktim yo ye, epi yo pa dwe janm konfonn yo ak kriminèl ki ap terorize yo chak jou yo.
Pou fini, RHAJAC reyafime angajman li pou li kontinye mande ankèt endepandan epi pote plent devan lajistis. Yo konkli nòt la ak yon mesaj klè: pèsòn pa dwe anwo lalwa.
