« Mwen pran desizyon pou m rann piblik epi aksesib rezime egzekitif tout rapò ankèt yo jounen jodi a bay otorite pousuit yo », deklare Hans Jacques Ludwing Joseph, direktè ULCC nan kad yon konferans pou laprès li tap bay nan tèt kole ak minis jistis ak sekirite piblik la mèkredi 4 dawout 2021 an.
Direksyon jeneral ki la pou lite kont koripsyon remèt ak komisè gouvènman 10 rapò ankèt nan jounen 4 dawout an devan minis jistis lan mèt Rockfeller Vincent.
Daprè Hans Jacques Ludwing Joseph, an matyè koripsyon, lajistis dwe defann enterè Leta ayisyen. « Nou ap tann desizyon lajistis ap gen pou pran yo san enpasyalite. Sa k ap bay plis ekla epi serye ak travay nou an se pou mezi sanksyonatris yo pran kont moun ki ta dwe bay egzanp yo epi se yo k ap vyole lalwa », pawòl direktè ULCC a.
Minis jistis ak sekirite piblik la, bò kote pa li ,remèsye direktè ULCC a pou rapò sa li rive reyalize a sou yon pakèt dosye koripsyon ki enpòtan pou repiblik Dayiti.
» Minis jistis ak sekirite piblik mwen ye an, mwen pran remiz solanèl rapò ankèt sa yo. » Batay kap mennen kont koripsyon an p ap janm nan okenn sans yon fòm pèsekisyon politik okontrè, li se yon devwa moral kote nou tout konsène », Rockfeller Vincent
Yon lòt kote, Rockfeller Vincent mande otorite Lajistis yo pou pran kouraj yo ak debwa pou bay suit ak ansanm rapò ankèt ULCC mete deyò sou koripsyon an.