Echojounal echojounal.net
Related Articles
Nan mitan yon gwo kiryozite ak anpil keksyon ki ap poze, gouvènman Ameriken an, atravè reprezantasyon diplomatik li an Ayiti, tante bay esplikasyon sou rezon ki fè twa (3) gwo bato lagè li yo ap moute desann nan Bè Pòtoprens depi kèk jou.
Anbasad Ameriken an sèvi ak rezo sosyal X (ansyen Twitter) pou li eseye jistifye operasyon sa a ki pote non « Southern Spear » (Lans nan Sid). Dapre sa anbasad la rapòte, se sou enstriksyon dirèk « Sekretè Lagè » Etazini an, Pete Hegseth, misyon sa a ap dewoule.
Dapre esplikasyon diplomat yo bay, prezans fòs naval sa yo pa la pou kraze brize, men okontrè: « Prezans bato sa yo reflete angajman san fay Etazini an favè sekirite, estabilite ak yon avni miyò pou Ayiti. » Marin ak Gad Kòt Ameriken yo prezante tèt yo kòm patenarya ki ap travay pou yon Ayiti ki « pi prosper. »
Malgre esplikasyon diplomatik yo ki ap pale de « estabilite », obsèvatè politik yo pa ka anpeche yo fè koneksyon ak lòt gwo aksyon fòs sa yo sot fè nan rejyon an. Se menm gwoup bato ak inite elit sa yo ki, nan mwa janvye 2026 la, te mennen operasyon « Absolute Resolve » ki te bout ak kapti prezidan Venezyelyen an, Nicolas Maduro.
Lefèt ke se menm fòs ki te depoze Maduro a ki jodi a nan dlo Pòtoprens lan, sa bay esplikasyon Anbasad la yon lòt pwa. Anpil moun wè sa tankou yon mesaj ki pi fò pase senp mo « koperasyon », sitou nan yon moman kote sekirite peyi a nan yon kafou tenten.
Nan tantativ esplikasyon sa a, Etazini mete aksan sou nesesite pou gen yon « Ayiti ki pi an sekirite. » Nan pratik, sa vle di:
Kontwole sa ki ap antre ak sa ki ap soti nan pò kapital la.
Dekouraje gang ame yo ki ta vle sèvi ak lanmè a pou aktivite yo.
Montre yon prezans militè ki ka reponn byen vit si sitiyasyon an ta vire mal sou tè fèm nan.
Pandan 7 fevriye a ap pwoche, je tout moun rete fikse sou dlo a pou wè si « esplikasyon » Etazini yo ap tradwi nan yon chanjman reyèl pou sekirite popilasyon an.
