Echojounal echojounal.net
Related Articles
Sityasyon an vin cho kou vèb nan rejyon Mwayen Oryan an nan lannwit dimanch 7 jwen 2026 lan. Pou premye fwa depi akò kase-kòd (cessez-le-feu) ki te siyen nan kòmansman mwa avril la, gouvènman Teheran an lage yon gwo atak misil balistik sou teritwa izrayelyen an. Aksyon sa a vin mete plis lwil sou dife epi reviv gwo kè sote sou yon posib lagè jeneralize nan zòn nan, apre plis pase 100 jou batay san pran souf.
Atak sa a vini kòm yon repons dirèk (reprezay) kont Lame Izrayèl la. Pi bonè nan menm jounen dimanch la, aviyasyon izrayelyen an te bonbade katye jeneral gwoup Hezbollah a nan zòn Dahiyeh, ki nan banlye sid lavil Beywout (Liban). Izrayèl te mennen frape sa a apre Hezbollah te fin voye plizyè fize sou nò teritwa li.
Dapre sous militè yo, Iran voye anviwon yon dizèn misil balistik. Kò Gad Revolisyon Islamik la (CGRI) fè konnen yo te vize espesyalman baz ayeryen Ramat David ki nan nò Izrayèl. Pou yo, se sou baz sa a avyon Izrayèl yo te decole pou ale frape peyi Liban.
Malgre gwo kouri sa a te lakòz plizyè milyon moun kouri kache nan abri anti-bonm, sistèm defans Izrayèl la rive kraze prèske tout misil yo nan syèl la, epi rès yo tonbe nan zòn kote moun pa rete. Pa gen okenn gwo dega ni moun blese ki rapòte pou moman an. Sepandan, kòm mezi sekirite, otorite izrayelyen yo deside fèmen lekòl yo epi entèdi gwo rasanbleman moun nan zòn nò peyi a.
Pandan Chèf aprè-majo lame Izrayèl la, Lyetnan-Jeneral Eyal Zamir, deklare fòs li yo pare pou yo replike kòmsadwa depi lidè politik yo bay vèt, kominote entènasyonal la ap fè gwo presyon pou evite pi gwo dezas. Prezidan ameriken an, Donald Trump, entèvni piblikman kote li mande Premye Minis Benjamin Netanyahu pou l pa reponn ak lòt frap, pou yo ka pwoteje negosyasyon ki ap fèt ak Teheran. Selon lidè ameriken an, Iran te vle voye yon « avertissement » sèlman, epi kounye a se sou tab diskisyon pou tout moun tounen.
Pou evite sipriz, gouvènman iranyen an deside fèmen espas ayeryen li nan zòn lwès peyi a. Peyi vwazen yo tankou Irak (pou 72 èdtan) ak Siri (pou 12 èdtan) pran menm desizyon sa a tou. Tout siyal sa yo montre tout rejyon an rete sou vòltaj, pandan yo ap siveye si lagè a, ki te kòmanse depi nan finisman sezon ivè a, pral rekòmanse pi rèd.
