Echojounal Echojounal se jew zòrèy ou
Atik Ki Lye
Gras ak travay otorite defakto yo nan tèt peyi a nan livre zòn yo bay bandi yo, cha PNH yo vin tounen yon djab pou popilasyon an.
Si nan zòn bandi yo poko pran yo popilasyon an ap mande pou voye cha pou vin ede yo batay e pwoteje zòn yo, anbyen, zòn ke mesye ak zàm yo gentan pran yo, popilasyon an ki livre pou kont li an cha PNH yo se yon djab pou yo, yo akize cha yo ki pran plezi touye moun pou granmesi sou pretèks se bandi yo ap touye.
Selon kèk nan moun ki pa gen kote pou yo ale yo ki, oblije rete nan zòn ke bandi yo kontwole yo se cha PNH yo ke yo rele « Ti cha » a ki, ba yo plis pwoblèm, ki ap tiye yo, ki anpeche yo soti al vakye ak aktivite yo, selon sa yo fè konnen yo pa te fè anyen pou te anpeche bandi yo pran zòn yo, kounye a se pèp la ki ap peye po kase a, bandi ap touye yo, lapolis ap touye yo.
Yo denonse cha yo ki pa janm mennen yon operasyon serye pou pran kontwòl zòn yo nan men bandi yo men ki pran plezi mache tire tout lannwit tout lajounen sou popilasyon an, pran jèn fanm ak jèn gason al touye sou pretèks yo se bandi, yo se toutè, yo mande nouvo DG PNH la, André Jonas Vladimir Paraison pou chanje vye pratik sa pou yo pou yo ka rale yon souf.
Pou yon lòt gwoup si ti cha pa te la sa te ka pi mal, bandi yo te ka fè plis dega, gwoup sa bat gwo bwavo pou efò kèk polisye ki ap batay lannwit kou lajounen pou repouse bandi yo, selon yo si polisye sa yo te jwenn lòd, pwoblèm ensekirite a tap gentan rezoud, yo lonje dwèt sou gwo tèt yo nan lapolis ki nan mafyozo ak bandi yo ki lakoz bagay yo dejenere konsa.
Yo menm tou yo fè konnen lè yo wè ti cha yo oblije kouri, sa yo rekonèt ki pa ta dwe fèt paske misyon lapolis la se pwoteje ak sèvi, yo fè konnen se otorite defakto yo ki nan tèt peyi a ki vle mete lapolis la anfas popilasyon an ki lakoz.
