Echojounal echojounal.net
Related Articles
Pandan Konsèy Elektoral Pwovizwa a (KEP) pibliye nouvo kalandriye ki repòte premye tou eleksyon jeneral yo pou 18 jiyè 2027, yon gwo kè sote ap vale teren pami travayè, fonksyonè piblik ak pwofesyonèl ki anvi patisipe nan kous elektoral la. Fas ak ensètitid ki plane sou reyalizasyon vòt yo nan dat sa a, potansyèl kandida sa yo lanse yon apèl ijan bay manm KEP yo pou yo rekonsidere atik nan Dekrè Elektoral la ki egzije yon lèt dispans oswa demisyon omwen de (2) mwa davans.
Pou pwofesyonèl sa yo, ki deklare yo vle mete konesans ak eksperyans yo nan sèvis peyi a, aplikasyon estrik dispozisyon sa a nan kontèks aktyèl la reprezante yon gwo pyèj ekonomik ak pwofesyonèl. Dapre yo, pa gen okenn garanti fòmèl ki montre eleksyon yo ap fèt tout bon vre nan lane 2027, lè nou konsidere dat yo te deja chanje plizyè fwa akòz ensekirite ak pwoblèm lojistik.
« Nou vle sèvi peyi a epi ofri sa nou te aprann pou ede li soti nan kriz la, men nou pa ka sakrifye mwayen sibzistans nou san garanti », se sa plizyè travayè ki konsène fè konnen. Yo souliye ke si yo oblije kite pòs yo oswa mande miz an disponiblite (dispans) dapre delè lwa a fikse a, alòske eleksyon yo riske repòte pou yon lòt ane, yo pral twouve yo nan lari, san travay epi san revni pou okipe fanmi yo.
Anplis pè pèdi djòb yo, potansyèl kandida yo denonse chay administratif ki egziste nan bwat Leta yo ak nan sektè prive a. Souvan, menm lè yon anplwaye fè demann dispans li a tan, administrasyon an pran anpil reta pou delivre papye a, sa ki ka lakòz KEP rejete dosye kandidati a poutèt pyès enkonplè.
Selon obsèvatè ak moun ki ap travay yo, si KEP a pa fè okenn amandman oswa fè limyè sou pwen sa a, pwosesis la riske ekskli pwofesè, teknisyen, ak kad konpetan ki viv de salè yo, pou li kite plas sèlman pou moun ki pa gen travay oswa politisyen ki gen gwo mwayen finansye.
Revandikasyon yo bay Konsèy Elektoral la
Pou evite yon gwo enjistis pwofesyonèl epi ankouraje patisipasyon tout pitit peyi a, travayè ki vle poze kandidati yo soumèt twa (3) rekòmandasyon klè bay manm KEP yo :
Ajiste delè dispans lan : Fikse obligasyon pou pran dispans lan sèlman nan moman kanpay elektoral ofisyèl la ap louvri (an avril 2027), olye de plizyè mwa anvan pandan etap enskripsyon yo.
Garanti reyentegrasyon an : Pran dispozisyon legal klè ki garanti nenpòt anplwaye ki pran dispans pou rezon elektoral ap reprann pòs li otomatikman si eleksyon yo ta repòte ankò oswa si l pa eli.
Fasilite pwosedi administratif yo : Aksepte kopi demann dispans ki gen akize resepsyon enstitisyon an nan moman depo pyès yo, pou evite blokaj biwokratik kanpe kandidati yo.
Jiskaprezan, otorite elektoral yo poko bay okenn repons ofisyèl sou demann sa a, men presyon an ap monte sou KEP a pou l adapte règ jwèt la ak reyalite sosyo-ekonomik peyi a.
