Echojounal echojounal.net
Related Articles
« Ordre des Défenseurs des Droits Humains » (ORDEDH) eksprime gwo sipriz ak kòlè l apre liberasyon sitwayèn Gemima PIERRE, yon desizyon yo kalifye ki fèt an deyò lalwa apre yon gwo ensidan ki te pase nan zòn Delmas 83, kote yon polisye ki te sou sèvis li te resevwa kalòt nan men dam sa a anvan l te reponn.
Daprè sa ORDEDH rapòte nan yon deklarasyon fòmèl, libere yon moun ki akize nan kalite aksyon sa a san li pa janm parèt devan Komisè Gouvènman an anba presyon ak enfliyans politik oswa sosyal se yon vyolasyon grav nan prensip ki baze sou lalwa epi yon gwo mank de respè pou diyite ajan ki ap pwoteje popilasyon an.
Sa ki plis konplike sitiyasyon an, daprè òganizasyon dwa moun nan, se fason enstitisyon an jere ka sa a. Pandan yo bay moun ki fè agresyon an libète ak enpinite, polisye ki te sou plas yo menm sibi konvokasyon epi yo tradui yo devan Enspeksyon Jeneral Lapolis Nasyonal
Dayiti (IGPNH).
Organizasyon an avèti ke kalite jesyon sa a kreye yon « de pwa, de mezir » ki kraze moral fòs larestan yo epi ki febli otorite lapolis la sou teren an.
Fas ak sa yo rele yon gwo deriv nan enstitisyon jistis la, ORDEDH fè plizyè rekòmandasyon klè:
1-Yo mande pou tribinal ki konpetan yo pran dosye a touswit pou yo ka fikse responsablite chak moun ak tout ekite.
2-Yo reyafime nesesite pou yo mete yon fren nan tout kalite entèferans nan travay lapolis ak lajistis.
3- ORDEDH voye yon mesaj ijan bay prensipal sendika lapolis yo (tankou SPNH-17 ak SYNAPOHA) pou yo soti nan silans yo epi vin defann entegrite ak diyite manm yo ki sou teren an.
Dosye sa a ap kontinye fè anpil bri sou rezo sosyal yo ak nan sosyete a, kote anpil moun ap tann pou yo wè ki reaksyon IGPNH ak Direksyon Jeneral PNH la ap bay sou sitiyasyon an.
