Echojounal echojounal.net
Related Articles
Nan yon moman kote pèp ayisyen an ap tann yon souf nan men pwòp otorite li yo, se bò lakay vwazen an nouvèl yo ap sot tonbe. Minis Afè Etranjè dominiken an, Roberto Álvarez, pran devan pou li anonse deplòman « Force de Suppression des Gangs » (FSG) la pou mwa avril ki ap vini la. Yon anons ki mete dlo nan bouch anpil obsèvatè e ki soulve yon kesyon fondamantal : Depi kilè se nan palè nasyonal lòt bò fwontyè a desizyon sou sekirite Ayiti ap pran ?
Sa ki pi blesan nan istwa sa a, se silans ki ap taye banda bò kote gouvènman ayisyen an. Pandan Álvarez ap bay detay sou kalandriye a ak kijan fòs sa a pral ranplase misyon Kenya a, otorite nan Pòtoprens yo sanble nan yon dòmi san vèy. Eske se paske yo pa okouran, osinon se paske yo pa gen vwa nan chapit la ankò? Lè se yon minis etranje yon lòt peyi ki ap anonse kisa ki pral pase lakay ou, sa montre aklè nivo feblès ak absans lidèchip ki gen nan tèt leta ayisyen an jodi a.
Ki enterè Sendomeng gen dèyè rido a ?
Pèsonn pa fèt pou gen memwa kout. Gouvènman Luis Abinader a pa janm sispann montre jan li gen yon pozisyon fèm kont migrasyon ayisyen an, avèk konstriksyon yon miray epi depòtasyon masiv chak jou Bondye mete. Lè Roberto Álvarez ap bat lestomak li pou li di peyi li ap bay sipò lojistik ak sekou medikal pou FSG la, nou dwe mande tèt nou : Kisa yo gen pou yo genyen nan sa ?
Gen de (2) gwo dout ki plane nan lespri anpil moun :
Kontwòl fwontyè a : Èske fòs sa a pral sèvi kòm yon baryè pou pwoteje enterè dominiken yo sèlman, pandan Ayiti ap rete nan menm kriz la ?
Lidèchip rejyonal : Sendomeng ap chèche montre kominote entènasyonal la se li ki « mèt » nan rejyon an, sa ki ba yo plis pouvwa pou yo dikte kondisyon yo bay Ayiti nan ane ki ap vini yo.
Ki manigans ki ap fèt anba tab ?
Sa ki ap pase la a sanble ak yon pyès teyat kote aktè prensipal yo (ayisyen) pa konn tèks yo, pandan direktè a (kominote entènasyonal la ak Sendomeng) ap deside ki lè rido a ap leve. Kisa ki te di nan rankont ant Jack Christofides (chèf FSG la) ak Roberto Álvarez ke pèp ayisyen an pa konnen ? Eske gen akò ki siyen sou do popilasyon an pou bay Sendomeng yon dwa rega sou tout sa ki ap fèt nan sekirite nou ?
Ayiti pa kapab yon peyi kote nouvèl enpòtan sou sekirite nasyonal li ap soti nan bouch moun ki pa gen ankenn manda nan men pèp ayisyen an. Pandan nou ap tann avril rive pou nou wè si « fòs » sa a ap vrèman pote chanjman, nou ap kontinye mande : Kote leta ayisyen an ? Kilè nou ap sispann tande vwa vwazen an ap pale nan non nou ?
