Echojounal echojounal.net
Related Articles
Sispens lan te total, men nan bout liy lan, se Laswis ki genyen batay la! Apre yon match san gòl (0-0) ki dire 120 minit, Swis yo rive rache tikè yo pou ka de final tounwa a gras ak yon seyans chout penalite kote yo te pi solid nan tèt ak nan pye. Viktwa sa a ouvè pòt yon gwo rankont pou yo kont ekip Ajantin lan.
Pandan tout match la, ni Kolonbi ni Laswis pa te manke anbisyon. Kolonbyen yo te mize anpil sou vitès yo ak jwèt kreyatif yo, men yo te tonbe sou yon blòk Swis byen plase ki pa te lache yon pous tè. Malgre plizyè gwo aksyon nan de kote yo, ni tan reglemantè a, ni de peryòd pwolongasyon yo pa te sifi pou ekip yo te separe. Se konsa de fòmasyon yo te oblije al jije nan tès ki pi mechan nan foutbòl la: seyans chout penalte a.
Nan egzèsis sa a kote fòs mantal la konte plis pase anyen, jwè Swis yo te montre yo gen yon sanfwa enpòtan. Pou bò kote Laswis la, tirè yo te san fòt: Manuel Akanji, Granit Xhaka, Remo Freuler ak Zeki Amdouni tout te make san tranble.
Bò kote Kolonbi, presyon an te twò lou. Si Luis Díaz ak James Rodríguez te reyisi mete pa yo a dedan, de lòt jwè te bite nan chemen an. Gadyen Swis la te fè yon gwo parad pou li repouse kout pye Rafael Santos Borré a, epi answit, Jhon Durán te voye chout pa l la deyò, sa ki te siyen eliminasyon ekip li a kachkach.
Avèk siksè sa a (4 chout penalte kont 2), Laswis valide tikè l ofisyèlman pou pwochen etap la. Kounye a, je yo fikse sou pwochen advèsè yo a ki se Ajantin. Sa pral yon lòt kalite tès pou Swis yo, men apre yo fin elimine yon gwo moso tankou Kolonbi, moral ekip la nan tèt nèt pou yo al defye l’Albiceleste.
