Echojounal echojounal.net
Related Articles
Non li se Martin Expérience. Pou anpil moun, non sa a sonnen tankou yon kalite ke chak ekip bezwen nan moman difisil yo: « eksperyans ». Poutan, dèyè non sa a kache istwa yon jèn gason ki fèt an Frans, men ki gen san Ayiti ki ap bouyi nan venn li. Lateral gòch solid sa a ki ap evolye nan ekip AS Nancy-Lorraine vin tounen youn nan poto mitan seleksyon nasyonal Ayiti a, « Les Grenadiers », sitou nan moman istorik kote ekip la ap prepare pou li jwe nan faz final Mondyal 2026 la.
Martin Yves Expérience fèt nan dat 9 mas 1999 nan vil Châteaubriant, ki sitiye nan rejyon Breteyn nan peyi Lafrans. Se la li grandi e se la tou li kòmanse frape premye boul li.
Depi li te tou piti, talan li te kòmanse parèt klè nan nivo fòmasyon nan peyi Lafrans:
2006–2012: Li kòmanse jwe foutbòl nan klèb Cercle Paul Bert Bréquigny.
2012–2017: Li entegre sant fòmasyon prestijye Stade Rennais FC, yon gwo klèb franse ki renome pou jan li byen fòme jèn jwè.
Malgre li fèt ak leve lòt bò dlo, Martin toujou te gen yon atachman pwofon ak Ayiti, peyi orijin fanmi li. Jan li te konfye sa nan plizyè entèvyou, depi lè li te nan sant fòmasyon Rennes, li te toujou gen nan tèt li pou li pote mayo ble ak wouj la yon jou si opòtinite a te prezante.
Pakou nan Klèb: Yon Batay San Rete pou Rive nan Nivo Pwofesyonèl
Chemen Martin Expérience an Frans pa te yon kous ki fasil, men detèminasyon li fè li travay di pou li monte nivo yo youn apre lòt. Apre li fin kite Rennes, li te fè yon ti pase nan ekip jèn Xerez nan peyi Lespay anvan li te tounen an Frans pou li bati karyè li nan nivo senior.
Men kouman parcours li te ye nan klèb yo:
2018–2020: US Changé/Nasyonal 3/ Amatè. Li kòmanse pran eksperyans nan nivo senior (18 match).
2020–2022: US Avranches/Nasyonal 1. Li kòmanse fè non li nan 3yèm divizyon, kote li te menm pataje chanm ak Azzedine Ounahi (entènasyonal Mawoken).
2022–2024: SO Cholet/Nasyonal 1. Li vin yon jwè endispansab sou kote gòch la, kote li jwe 54 match epi li make 3 gol.
2024–Kounye a: S Nancy-Lorraine /Nasyonal 1 / Ligue 2. Li siyen premye kontra pwofesyonèl li. Li te yon poto mitan nan monté klèb la nan Ligue 2 kote li kontinye ap enpoze li kòm titilè.
Nan klèb Nancy, Martin montre tout matirite li. Li kapab jwe kòm aryè gòch (left-back) men fòs fizik li ak teknik li pèmèt li monte nan mitan teren an tou pou li bay ekip la plis dinamism.
Pakou nan Seleksyon: Yon Rèv ki Vin Yon Reyalite Istorik
Premye fwa Martin Expérience te mete mayo seleksyon nasyonal la se te nan mwa jiyè 2021. Li te fè premye match li anba gidans estaf teknik la nan yon viktwa eklatan (6-1) kont Saint Vincent ak Grenadines nan eliminatwa Gold Cup la. Depi lè sa a, li pa janm gade dèyè.
Men gwo moman li ak Grenadiers yo:
Patisipasyon nan Gold Cup: Li te prezan nan edisyon 2021 ak 2023, kote li te montre solidite li kont gwo tonton ekip nan zòn CONCACAF la.
Nations League: Li tounen yon jwè kle nan sistèm defansiv Ayiti a gras ak vitès li ak kapasite li pou li repouse atak advèsè yo.
Kalifikasyon Mondyal 2026: Anba direksyon antrenè Sébastien Migné, Martin te patisipe aktif nan kanpay istorik kote Ayiti rive jwenn tikè li pou Mondyal 2026 la apre yon bèl viktwa (2-0) kont Nikaragwa nan mwa novanm 2025.
Pou Martin, reprezante Ayiti se plis pase foutbòl; se yon fason pou li fè fanmi li ak tout pèp ayisyen an fyè, sitou nan pote kè kontan bay yon nasyon ki renmen espò sa a anpil.
Jodi a, ak 27 lane sou tèt li, Martin Expérience ap prepare pou li ekri pi bèl paj nan istwa foutbòl li. Pandan li ap konplete yon lòt bèl sezon nan Ligue 2 ak Nancy, je l fikse nèt sou gwo randevou Mondyal la. Istwa jwè sa a montre kouman pasyans, travay di, ak fideldite ak rasin ou kapab mennen ou nan pi gwo somè espò wa a.
