Echojounal echojounal.net
Related Articles
Pandan yon gran rasanbleman politik ki te fèt jou ki te samdi 24 oktòb 2026 la nan vil Perry, nan leta Georgia, prezidan ameriken an, Donald Trump, reprann yon diskou ki te deja lakòz gwo kòlè ak polemik sou sèn entènasyonal la.
Pandan li te ap pale pou sipòte kandida reponsab yo pou eleksyon yo, Trump te atake senatè demokrat Leta Georgia a, Jon Ossoff. Trump akize senatè a kòm moun ki ap sipòte yon pwopozisyon lwa ki ta dwe fasilite antre imigran ki soti nan plizyè peyi, tankou Ayiti, Somali ak Yemen.
Pandan diskou li a, Donald Trump te dekri peyi sa yo kòm zòn ki « enfeste ak teroris », anvan li te sèvi ak fòmilasyon « shithouse countries » (peyi twou poupou / peyi de mèd) pou li kalifye yo. Fraz sa a voye panse moun dwat devan nan ane 2018, lè li te itilize yon ekspresyon ki sanble anpil pandan yon reyinyon sou imigrasyon nan Kay Blanch lan.
Atak Donald Trump yo te vize espesyalman pwogram Statut de Pwoteksyon Tanporè (TPS) ki pwoteje milye Ayisyen ak lòt nasyonalite ki ap viv sou tè ameriken an kont depòtasyon akòz kriz politik, sekirite ak katastwòf natirèl nan peyi dòmisil yo.
Deklarasyon sa yo deklanche gwo reyaksyon ak kòlè nan mitan kominote ayisyèn nan nan peyi Etazini ansanm ak nan plizyè òganizasyon ki ap defann dwa moun. Anpil lidè politik ak sosyete sivil la denonse deklarasyon sa yo kòm pawòl ki gen karaktè xenofob epi ki vize stigmatize imigran ki ap chèche sekirite ak yon pi bon lavi.
Bò kote pa yo, responsab kanpay senatè Jon Ossoff la reponn pou di yo ap kontinye defann yon politik imigrasyon ki pi jis ak imen, pandan yo kritike fason Trump ap sèvi ak imigrasyon kòm yon zam politik pou divize peyi a ak eksite baz elektoral li.
Dosye TPS la ak kesyon imigrasyon an rete youn nan sijè ki pi cho nan batay politik ki ap fèt nan peyi Etazini pou eleksyon yo, pandan kominote ayisyèn nan ap swiv ak anpil enkyetid avni pwogram pwoteksyon sa yo.
