Echojounal echojounal.net
Related Articles
Pandan Konsèy Minis lan sot pase men nan dekrè elektoral la jan nou te deja anonse sa nan edisyon presedan nou yo, dinamik pou kontwole aparèy Leta a ap kontinye ak tout vitès. Bò kote pa l, Konsèy Elektoral Pwovizwa a (KEP) deja soti yon kominike pou l anonse kèk ajisteman ak pase men nan fason bagay yo ap òganize pou pwochen eleksyon yo.
Nan mitan chanjman sa yo, Marie-Ange Loméus sot jwenn nominasyon l kòm nouvèl direktris Caisse d’assistance sociale (CAS). Dapre enfòmasyon ki disponib yo, li gentan enstale nan pòs sa. Anviwonman politik la rapòte se Wilner Joseph, yon gwo mapou ak kandida pou fòmasyon politik « Viktwa » ki se platfòm pouvwa an plas la, ki parenn nominasyon sa a.
Mouvman sa a ap fèt pandan direktris ki te dwe kite tèt enstitisyon an toujou nan wout pou l ale, sa ki kreye plis tansyon ak diskisyon sou jan administrasyon an ap jere.
Moun ki ap swiv dosye a remake se pa premye fwa gwo ponyèt politik konsa ap poze. Apre yo fin pran kontwòl plis pase 8 ministè nan gouvènman an ak kat gwo direksyon jeneral ki gen chay ak anpil enpòtans, Wilner Joseph rive mete yon lòt anplwaye Trezò Piblik nan yon pòs stratejik. CAS se yon enstitisyon ki gen yon gwo kapasite pou l deplase ak mobilisè fon piblik, yon detay ki gen anpil pwa nan peryòd elektoral.
Priz de kontwòl sa a sou resous ak enstitisyon Leta yo vin mete plis dout nan lespri obsèvatè yo sou kesyon netralite tranzisyon an, sitou depi Premye Minis de fakto a, Alix Didier Fils-Aimé, fin monte propriyete ak platfòm politik pa l la. Tout siyal sa yo ap voye yon mesaj klè bay popilasyon an ak klas politik la sou fason aparèy Leta a ap sèvi pou prepare teren an anvan gwo van eleksyon yo kòmanse soufle.
