Echojounal echojounal.net
Related Articles
Pandan nasyon an ap nwaye nan san ak laperèz, sèl priyorite gouvènman an sanble se fouye pi fon nan pòch yon pèp ki deja nan kriz. Pandan plizyè jou, negosyasyon yo ap fèt an kachèt pou fikse nouvo pri pwodwi petwolye yo, kote yo pale de 725 goud pou yon galon gazolin. Men, kesyon tout moun ap poze se: Ki bò Leta ye lè gang ap masakre sivil nan Jean Denis epi koupe fache ak rès peyi a sou wout nasyonal yo?
Dapre enfòmasyon ki soti nan koulwa pouvwa a, otorite yo te vle mete gaz la nan 950 goud, men apre presyon, yo ta sanble desann li a 725 goud. Si pou gouvènman an sa se yon « efò », pou mas pèp la se yon kout ponya anba kòt. Chak fwa pri gaz la moute, se pri transpò ak manje ki moute de fwa plis, nan yon peyi kote grangou ap taye banda.
Jean Denis nan san, Leta nan kalkil lajan
Sa ki pi revoltan nan kriz sa a, se silans ak endiferans otorite yo devan masak ki ap fèt nan zòn Jean Denis. Pandan yo ap diskite sou konbyen kòb yo pral fè sou do chofè yo, yo pa di yon mo sou fanmi ki ap peri anba bal gang, sou kay ki ap boule, ak sou moun ki ap kouri kite zòn nan san anyen nan men yo. Pou gouvènman sa a, sanble lavi moun Jean Denis pa vo menm yon galon gazolin.
Wout Nasyonal yo tounen « Simityè » ak « Ladwann » pou Bandi
Se pa sèlman Jean Denis ki ap soufri. Wout Nasyonal #1 ak #2 tounen yon lanfè pou nenpòt moun ki ap vwayaje. Pandan Leta ap kalkile taks sou gaz, bandi ak zam fin mèt wout yo, yo ap piye kamyon machandiz, kidnape moun, epi fòse chofè yo peye « taks pa yo » pou yo ka pase.
Ki lojik ki genyen pou yon gouvènman ap mande pèp la peye gaz pi chè, alòske li pa kapab garanti sekirite pou gaz sa a menm sikile sou wout yo?
Atitid sa a montre aklè jan moun ki ap dirije yo debranche ak reyalite malere a. Yo konsantre sou ranpli kès Leta, men yo abandone misyon prensipal yo: pwoteje ak sèvi.
Jounen jodi a, pèp la pa sèlman ap mande pou pri gaz la pa moute, yo ap mande:
Lajistis ak sekirite pou Jean Denis ak tout lòt zòn ki anba grif bandi.
Liberasyon wout nasyonal yo pou moun ka sikile san kè sote.
Yon sispann nan politik chèf ki enterese nan lajan sèlman pandan pèp la ap mouri anba bal ak grangou.
Si negosyasyon sou gaz la rive nan bout li san gouvènman an pa di anyen sou sekirite peyi a, sa va prèv final ke enterese yo se pa lavi moun, men se lajan ki nan ponp lan.
