Echojounal echojounal.net
Related Articles
Lapolis nasyonal la anba gwo kritik apre yon etidyan nan Fakilte Medsin ak Depatman Sante Piblik (FMPOS) nan Inivèsite Leta Ayiti (UEH) pran bal jodi mèkredi 1ye jiyè a nan zòn Bourdon. Ensidan sa a rive nan moman etidyan yo te ap manifeste nan lari a pou revandike reouvèti ak relokalizasyon Lopital Inivèsite Leta Ayiti (HUEH), ke tout moun konnen sou non « Lopital Jeneral ».
Manifestan yo, ki te ap mache nan direksyon Primati a pou pote vwa yo bay otorite yo, te wè mouvman yo a kanpe sibitman nan mitan gwo tansyon ak kout bal. Malgre jiskaprezan pa gen okenn vèsyon ofisyèl ki soti nan bò kote Direksyon Jeneral Lapolis la pou
klere sa ki pase a, plizyè temwen sou plas lonje dwèt sou jan fòs lòd yo mize sou represyon olye yo pwoteje sitwayen ki ap revandike dwa yo.
Pou anpil moun, zak sa a montre yon lòt fwa ankò yon mank pwofesyonalis ak yon itilizasyon fòs ki pa nesesè kont jèn ki ap defann yon kòz ki jis : dwa pou popilasyon an jwenn lasante ak dwa pou etidyan yo fin fòme tèt yo pou sèvi peyi a.
Pou kounye a, idantite etidyan ki blese a ak fason eta sante li ye poko fin klè, men sitiyasyon sa a pwovoke gwo kòlè ak emosyon nan mitan rès manifestan yo. Etidyan yo ak plizyè òganizasyon nan sosyete sivil la mande pou limyè fèt vit prese sou zak sa a epi pou otorite yo sispann sèvi ak bal pou reponn ak kriz sosyal ak edikatif k ap sakaje peyi a.
