Echojounal echojounal.net
Related Articles
Sa ki te yon senp posiblite vin yon reyalite konfime: Grenadye yo konnen kounye a ki adversè yo pral afwonte nan Ligue des Nations nan zòn CONCACAF la. Se pa okenn lòt ke seleksyon Etazini an. Yon konfrontasyon de fwa (ale ak retou) ki pwomèt anpil emosyon nan mwa novanm ki ap vini an.
Nan premye manch lan, Ayiti ap resevwa ekip ameriken an anvan li fè deplasman pou al jwe match retou a nan TQL Stadium nan Cincinnati, Ohio.
Lè nou gade nan achiv yo, de ekip sa yo gen yon long istwa ansanm sou teren an. Sou 19 fwa yo deja kwaze:
* 🇭🇹 6 viktwa pou Ayiti
* 🇺🇸 8 viktwa pou Etazini
* 🤝 5 match nil
* ⚽ 20 gòl te make pa Grenadye yo
* ⚽ 26 gòl te make pa ekip ameriken an
Malgre Etazini gen yon ti avantaj nan chif yo, diferans lan piti anpil. Sa montre klèman ke Ayiti toujou konn kijan pou li fè ekip ameriken an pase pa tout koulè, e ke afwontman sa a gen tout karakteristik yon vrè klasik rechaje nan zòn lan.
Match sa a reprezante pi plis pase yon senp afwontman klèb oubyen yon match amikal; se yon plas nan katriyèm pi bon ekip yo (Final Four) ak yon tike dirèk pou pwochen Gold Cup la ki sou tablo a.
Moun yo ap tann pou wè kijan estaf teknik la ak jwè yo ap prepare pou resevwa premye chòk la anvan yo pran volan pou Cininnati. Grenadye yo gen yon bon okazyon pou yo ekri yon lòt bèl paj nan listwa foutbòl ayisyen an.
